O Centro Municipal de Coñecemento La Molinera (aula CeMIT), emprazado en Ourense, vén de presentar o seu programa de actividades de divulgación TIC para o mes de abril, un programa interxeracional moi acaido para quen queira dar os seus primeiros pasos no ámbito tecnolóxico e, tamén, para quen xa conte con formación previa. Para os primeiros, o roteiro formativo de abril (unha proposta para todos os públicos) incluirá un obradoiro de iniciación á informática, que se desenvolverá de luns a venres, de 9.30 a 11,30 horas, desde o día 17 ata o 25. As persoas interesadas poderán inscribirse desde o día 10. Tamén este mes impártese obradoiro Compra de forma segura en Internet, os días 3, 4 e 6 de abril, de 9,30 a 11,30h.

O programa Xoves inspiradores incorpora como novidade un obradoiro de marca persoal, previsto para o día 27, de 18,20 a 20,30 horas, e impartido por Patricia Vázquez e Alba Moretón. Tamén ao abeiro deste programa, continuará o día 6 o Obradoiro de argumentación e debate que imparte Aida González, campioa do mundo de debate universitario en español 2016.

Outra das accións novas é o taller Re-creando: Novas tecnoloxías aplicadas á arte, os días 21 e 28 de abril pola tarde, para nenos e nenas de 10 a 16 anos. Por outra banda, está programada unha sesión de fotografía para emprendedores prevista para o día 28 de abril. As persoas interesadas poden inscribirse nas actividades páxina web www.lamolinera.net, ou solicitar máis información no centro municipal emprazado no número 1 da rúa Abrevadeiro, 1 (teléfono 988 374 523).

Por certo que este mes tamén proseguirán nas instalacións ourensás tres obradoiros de axuda aos nosos profesionais e desenvolvedores: un de introdución á tecnoloxía open source Arduino, outro de electrónica básica para robótica e outro de asesoramento de proxectos. Na vertente para crianzas proseguen Arquimakers-kids: crear para pensar e Team makers kids: robótica – apps.

O programa de abril complétase co obradoiro de educación emocional Akademia, para mozos de 16 a 22 anos, e o curso de fotografía do programa municipal Universidade Popular.

O proxecto Youtubeir@s, destinado a encher as redes de contidos audiovisuais na nosa lingua (facendo especial fincapé en YouTube), vén de recibir un importante pulo nun dos concellos galegos onde, precisamente, máis se ten traballado para galeguizar a grella dixital dispoñible: o concello de Carballo. Sen ir máis lonxe, Carballo celebra cada ano un festival de webseries, o Interplay, que é pioneiro e referencial por varios motivos, non só por reivindicar o que fan os nosos creadores, senón tamén por ter apostado por un formato (o das series en liña) que hai anos era visto case como unha simple ocorrencia e hoxe é un terreo fértil para industria, creadores e seareiros. Segundo informou o Concello, esta semana comezaron os obradoiros de videocreación arredor de Youtubeir@s, ou sexa, o adestramento previo á participación no certame.

Este martes, sen ir máis lonxe, celebráronse no IES Monte Neme e no Pazo da Cultura dúas das tres accións formativas previstas. Os participantes son creadoras e creadores interesadas/os en facer e difundir vídeos na Rede de opinións e titoriais en galego. As actividades veñen da man do Concello, máis polo miúdo do seu Servizo de Normalización Lingüística. O terceiro dos obradoiros terá lugar no IES Isidro Parga Pondal, tamén reservado para o seu alumnado, e comezará o mércores 5 de abril ás 13:00 horas.

Cada un destes breves obradoiros prácticos ten unha duración de tres horas, repartidas en dúas sesións: unha primeira dunha hora, máis teórica, na que se traballarán consellos básicos para sacarlles o maior partido ás cámaras dos dispositivos móbiles e na que se aprenderá a guionizar para transmitir mellor os coñecementos. Na segunda sesión formativa, máis práctica e de dúas horas, aprenderase a editar e difundir os vídeos.

Youtubeir@s, como lembraremos, é unha iniciativa dos servizos de normalización lingüística (SNL) dos concellos da Baña, A Coruña, Ames, Carballo, Mazaricos, Ourense, Pontevedra, Ribadeo, Santiago de Compostela, Teo e O Grove; e tamén das universidades da Coruña, Santiago de Compostela e Vigo. O proxecto ten tres piares fundamentais: a procura de youtubeiras e youtubeiros, a formación para quen queira selo, e un concurso para incentivar que se fagan vídeos de titoriais e opinións en galego na Rede, con 4.000 euros en premios, e co prazo de inscrición aberto até o 28 de abril.

Os vídeos que se presentarán ao certame, deberán ter unha duración máxima de 5 minutos, estar licenciados en creative commons (licencia aberta, feita para produtos que se queren compartir e co requisito de acreditar a autoría), seren producidos en galego e estaren habilitados na rede social YouTube. Os e as participantes poderán concorrer a dúas categorías: Vídeo-facermos (para videotitoriais que amosen como facer cousas) e Vídeo-opinarmos (para vídeos nos que se achegue unha opinión ou valoración sobre calquera tema.

Cada unha destas categorías vai ser premiada cunha contía de mil euros e tamén se asignarán catro mencións honoríficas de cincocentos euros segundo os criterios de valoración que terá en conta o xurado, composto por profesionais da comunicación audiovisual.
Youtubeir@s, en palabras das ditas entidades, “ten a vontade de incrementar o uso do galego nos contidos audiovisuais dunha das redes sociais máis empregadas no mundo, a segunda con meirande nivel de uso despois de Facebook, e tamén quere incitar e facilitar que todas as persoas compartan as súas habilidades e criterios con vídeos autoproducidos”.

A Cámara de Comercio de Santiago de Compostela vai ter un máis que completo semestre en materia de formación. Serán, segundo vén de facer saber a entidade, un total de 43 cursos e xornadas para a primeira metade de 2017, destinadas todas estas actividades a fomentar a actualización das habilidades profesionais dos traballadores das empresas da súa área cameral. Unha vez máis, as TIC serán un eixe fundamental das accións da Cámera. Haberá obradoiros de informática e novas tecnoloxías, de contabilidade financeira e manexo de redes sociais para a xestión da marca persoal, de fiscalidade, de recursos humanos e adestramento, de comercio e distribución. Podemos ver a listaxe completa de obradoiros e xornadas nunha ligazón específica da páxina da entidade.

En materia tecnolóxico-dixital, teremos no arranque do semestre un curso de Excel financeiro, outro de contabilidade financeira informatizada e outro de redes sociais para a xestión de marca. Máis confirmaranse máis detalle sobre as restantes actividades TIC. Sobre estes e outros cursos a Cámara lembra que as empresas interesadas poderán solicitar formación in situ, deseñada pola Cámara segundo as súas necesidades. Ademais, a entidade continúa coa política de descontos para os asociados, cun 20% de desconto, e tamén un 10% para matrículas anticipadas ata dez días antes do inicio da actividade formativa.

Reconto de 2016

A Cámara de Comercio lembrou tamén que o pasado ano programou e levou a cabo un total de 84 actividades formativas (36 cursos e 48 xornadas), que contaron coa asistencia de 1.879 alumnos. A temática centrouse, tamén, en formación sobre informática e novas tecnoloxías, economía e finanzas, recursos humanos e comercio e distribución.

Ademais, en 2016 a Cámara desenvolveu o Plan de apoio á competitividade do comercio minorista, financiado por fondos FEDER da Unión Europeo e promovido polo Ministerio de Economía e a Cámara de España para executar liñas de actuación orientadas á innovación e competitividade no pequeño comercio. A entidade realizou dezaséis diagnósticos de innovación comercial e organizou catro obradoiros sobre o impulso da tenda online e a posición en redes sociais en Melide, Santa Comba e Ribeira, e un taller de mercadotecnia en Santiago.

• Ata o 28 de febreiro permanece aberto o prazo de inscrición nun taller gratuíto sobre deseño responsivo
• A vindeira semana será posible inscribirse nun curso sobre retoque de imaxes que se desenvolverá en marzo

A multitude de dispositivos desde os que hoxe en día se accede a internet fan obrigado que o deseño de páxinas web deba ter como punto de partida o concepto de “responsivo”, a capacidade de adaptar a súa visualización a diferentes soportes e resolucións. Achegar as claves do deseño de webs responsivas a través das plantillas Bootstrap é a base do curso co que a Aula Tecnolóxica da Vicerreitoría do campus arrinca o 3 de marzo o seu programa formativo gratuíto e aberto a toda a cidadanía para este segundo cuadrimestre. “A día de hoxe navégase máis desde o móbil que desde un ordenador, polo que unha web que non se vexa nun teléfono está perdendo a maioría do seu público”, salienta o deseñador gráfico Alberto García Ariza, responsable de impartir un taller que mantén aberto o seu prazo de preinscrición.

Ter coñecementos de linguaxe html e ccss, para poder aproveitar os contidos do curso é o único requisito para nunha actividade que se desenvolverá entre o 3 e o 24 de marzo e que cubrirá a súa cota máxima de 20 alumnos e alumnas por orde de inscrición. Un curso que estará centrado nunha das ferramentas máis habituais para dotar ás webs desa capacidade de adaptación, o Bootsrap, “un conxunto de estilos e funcionalidades que podemos aplicar á nosa web”, como explica García Ariza. Nese senso, “explicar como se poden utilizar eses estilos que xa existen e como podemos modificalos para que se adapten ao noso deseño, xa que hai moitas páxinas nas que se traballa con Bootstrap e non son todas iguais”, constitúen os obxectivos centrais deste curso de doce horas. “Trátase dun framework moi sinxelo, co que podes traballar perfectamente cuns coñecementos de html e ccss”, engade García Ariza deste conxunto de funcionalidades que permite, “a través de retículas variables dependendo da resolución”, adaptar unha web á súa visualización a través de múltiples dispositivos sen necesidade de coñecementos de programación avanzados.
 

Do deseño web ao tratamento fotográfico

Abertos todos eles a calquera persoa interesada, a programación formativa promovida pola Vicerreitoría para a súa Aula Tecnolóxica abrangue entre marzo e maio outros catro cursos de doce horas, que se desenvolven en catro ou seis sesións en horario de tarde. Así, entre o 7 e o 16 do vindeiro mes, chegará a quenda de iniciarse no deseño e retoque de imaxes con software libre, nunha actividade impartida polo profesor de CCSS e da Comunicación Luis Fernández, que abrirá o vindeiro luns 27 a súa inscrición.

Xa en marzo, o día 17 dará inicio a preinscrición no taller Edición de video con software gratuíto: Blackmagic Davinci Resolve, que impartirá entre o 27 de marzo e o 5 de abril Alfonso Merino, mentres que a partires do 23 do vindeiro mes será posible inscribirse en Introdución ao retoque fotográfico con Adobe Photoshop, unha actividade impartida tamén por García Ariza que se desenvolverá entre o 31 de marzo e o 28 de abril e dedicada á afondar “desde cero, nun curso introdutorio” nas múltiples funcionalidades dun programa “que empregan tanto deseñadores gráficos, como ilustradores ou arquitectos”.

Este programa formativo pecharase, entre o 18 de abril e o 4 de maio con Deseño dun e-Portfolio, un curso impartido polo profesor José Vicente Novegil que abrirá a súa inscrición o 4 de abril e dirixido a achegar ao alumnado unha serie de destrezas tecnolóxicas e metodolóxicas que lles permitan elabora e utilizar este dossier como expresión da súa experiencia académica e profesional. 

Hai dez meses botaba a andar o Centro do Coñecemento de La Molinera de Ourense, "un elemento dinamizador e promotor da creatividade, tanto desde o punto de vista persoal como profesional" e unha "xanela aberta á innovación, creatividade e incorporación das novas tecnoloxías", segundo palabras do alcalde de Ourense, Jesús Vázquez. Proba disto é que neste mes de febreiro La Molinera achegará obradoiros de robótica para nenas e nenos, formación en comunicación dixital para mozas e orientación para as persoas interesadas en montar unha empresa dixital.

Máis polo miúdo, as actividades programadas en La Molinera consistirán nun Networking Startup, que converterá á cidade en punto de encontro entre a mocidade, administracións, empresas e universidade; e a xornada Novas canles de empregabilidade, na que se abranguerán temas como a marca persoal e a vídeo presentación persoal.

Asemade, este espazo adicado ás novas tecnoloxías que é La Molinera quere abrir novos vieiros de traballo para a mocidade, e nesta liña insírese o programa Xoves inspiradores. Así, ao abeiro deste ciclo, os días 9 e 23 de febreiro haberá un obradoiro de argumentación e debate; mentres que o 16 de febreiro realizarase outro obradoiro de redes sociais.

En canto aos máis novos, están previstos os obradoiros: Team makers kids, adicado á robótica, programación e proxectos dixitais; e o obradoiro educacional Arquimakers-kids.

Alén disto, La Molinera abre o prazo para os cursos da aula CeMIT (que neste mes de febreiro estará centrada nos obradoiros de Deseño e Impresión 3D) e para a creación dunha tenda a través de Internet. Aproveitando a presentación dos cursos que se celebrarán en febreiro, este martes o alcalde de Ourense facía fincapé na participación de La Molinera na Semana Europea do Emprendemento, unha actividade que se realiza en máis de 40 países (do 6 ao 10 de febreiro), sendo Ourense e Pontevedra "as únicas cidades galegas" que participan neste foro.

• Consellos para saír reforzados da transformación dixital sen horarios, desde a túa casa e con moi pouco orzamento

¿Escoitáchelo algunha vez?: “¿Para que imos estudar? ¡Se vivimos unha revolución! ¡Se o que aprendamos hoxe non servirá mañá para nada! ¡Se todo o mundo sabe que o sistema educativo ten que cambiar! De verdade, ¿para que imos estudar?”.

Saber que o 47% dos postos de traballo que hoxe coñecemos van desaparecer pode levar a dúas actitudes extremas. En primeiro lugar, a máis fácil: ¿para que esforzarse? Fronte a esta, por suposto, están os que non se resignan sexan como sexan os tempos que lles tocara vivir. Saben que chegan anos difíciles, de destrución de emprego, pero tamén de xeración, e hai tempo que aprenderon iso de que “a río revolto, ganancia de pescadores”.

As próximas liñas son para eles, para todos aqueles que aposten por saír reforzados do tsunami dixital, aínda que moitos se vexan obrigados a facelo con baixo orzamento e, nalgúns casos, mesmo “tendente a cero”.

Continuar lendo na fonte da noticia...