main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

22/10/201908:33
Cartel da iniciativa.
A Coruña

A rapazada da Coruña ten en novembro unha cita coa programación de videoxogos

A partir do 11 de novembro (até o día 30) vaise desenvolver na Coruña unha actividade formativa e divulgativa de gran interese para toda aquela rapazada que queira introducirse no camiño dos videoxogos: non un camiño calquera, senón un vieiro activo de construción, deseño e desenvolvemento. O obradoiro BiblioTECH de programación de videoxogos vai destinado a nenas e nenos de entre 10 e 16 anos, todos os sábados de novembro en horario de 11.30 horas a 13.30 horas. As inscrición poden ir formalizándose a partir do día 2 do mes vindeiro, até o día 9. As sesións levaranse a cabo na Biblioteca Municipal Infantil e Xuvenil Durán Loriga, da rúa do mesmo nome.

Segundo informan o Concello da Coruña e a Biblioteca, o fundamento do obradoiro é a programación orientada á creación de videoxogos (aínda que realmente os coñecementos adquiridos serven para todo tipo de aplicacións), para o que se contará con ferramentas de deseño en dúas e tres dimensións (como Scratch, programa gratuíto do Instituto Tecnolóxico de Massachusetts; Sploder, tamén gratuíto, que funciona cunha programación totalmente gráfica; e Kodu 3D, outro recurso de balde para o deseño de videoxogos en 3D, neste caso de Microsoft). Acerca das vantaxes e beneficios que se abren con esta actividade formativa, o Concello lembra que “a programación é unha disciplina lúdica e educativa, versátil e creativa, que premia a investigación e coa que quen programa pode atopar os seus obxectivos ou metas”. E engade: “A programación é quen de lanzarnos unha mensaxe moi positiva: non hai opcións malas, senón moitas e diferentes posibilidades”.

22/10/201908:26
Presentación da iniciativa.
Santiago de Compostela

Galicia súmase ao programa Aquae STEM para fomentar as vocacións científico-tecnolóxicas entre as nenas

  • A iniciativa, promovida por Viaqua, baséase nunha serie de retos arredor do desenvolvemento sostible que o alumnado deberá resolver con recursos tecnolóxicos

 

A conselleira de Educación, Universidade e Formación Profesional, Carmen Pomar, e o director xeral de Viaqua, Julio Masid, participaron onte na presentación do programa Aquae STEM, que chega aos centros de primaria galegos para fomentar as vocacións científico-tecnolóxicas, especialmente entre as nenas, a través da creatividade e a innovación. A iniciativa, promovida por Viaqua, foi presentada pola directora de Desenvolvemento Sostible desta compañía, Leticia Rodríguez, coa presenza tamén de representantes dos centros participantes. Un total de 10 centros galegos participarán este curso na primeira edición do programa, dirixido a alumnado de 2º a 6º de Primaria.

No acto de presentación, a conselleira Carmen Pomar apuntou que a fenda de xénero nas vocacións STEM “é un feito incontestable” que hai que atallar dándolle un impulso á vocación científica desde as idades máis temperás “e buscar referentes, sobre todo femininos, modelos necesarios para que as nosas alumnas comproben que o xénero non é impedimento para realizar todo o que se propoñan”.

Este é un dos obxectivos da Estratexia galega de educación dixital, Edudixital 2020, posto en marcha pola Consellería de Educación para dar impulso ás competencias STEM desde a etapa de Primaria e acompañando ao alumnado durante toda a súa traxectoria formativa. Ao abeiro desta Estratexia, Carmen Pomar sinalou accións como a introdución da Robótica como materia de libre configuración autonómica para que o alumnado de 4º e 6º de primaria se inicie na programación básica, na robótica e na construción; os espazos Maker, como lugares de fomento da creatividade e a formación para aprender facendo a través do deseño; ou os Clubs de Ciencia, como espazos de aprendizaxe non formal para dar resposta á curiosidade dos mozos e mozas, entre outros.

Actividades prácticas

O programa Aquae STEM que se presentou onte consiste no desenvolvemento de varias actividades prácticas que se realizarán na aula e na contorna dixital pensadas para espertar o interese do alumnado en xeral e das nenas en particular polas competencias STEM (Ciencias, Tecnoloxía, Enxeñaría e Matemática). O proxecto pon tamén o foco en sensibilizar o entorno das alumnas (familia, compañeiros de clase...), para que se sintan apoiadas no desenvolvemento das súas vocacións científicas e tecnolóxicas.

Está previsto que neste primeiro ano de funcionamento o programa chegue a 3.500 alumnas de centros educativos das Comunidades Autónomas nas que se inicia (Andalucía, Comunidade Valenciana, Rexión de Murcia, Castela-A Mancha, Castela e León e Galicia).

21/10/201917:04
Cartel do evento.
Santiago de Compostela

O CPEIG e a Amtega pechan o programa TechKids cunha xornada de obradoiros de programación, pilotaxe de drons e realidade viritual

  • Un centenar de rapaces participará este domingo na Cidade da Cultura na sesión de peche dos talleres xuvenís de verán “TechKids”, programa destinado a potenciar o talento dixital na mocidade galega

O Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (Amtega) organizarán o vindeiro domingo, 27 de outubro, a xornada final do programa “TechKids”, talleres sobre programación, robótica, drons e animación 3D celebrados durante o verán nas Aulas CeMIT de Galicia. O evento celebrarase de 11:00 a 14:30 horas no Edificio do Centro de Innovación Cultural (CINC) da Cidade da Cultura de Galicia.

A actividade, enmarcada no Programa de Promoción do Talento Dixital de Galicia, DigiTalent, está destinada a estimular o talento precoz no ámbito das tecnoloxías da información e comunicacións, así como fomentar o atractivo vocacional de profesións científico-tecnolóxicas entre a poboación máis nova. En concreto, a organización ten prevista a participación de aproximadamente un centenar de rapaces e rapazas de 10 a 17 anos nunha xincana tecnolóxica con seis obradoiros diferentes. Os interesados en participar poden facelo a través da web: https://cemit.xunta.gal/frm_tech_kids e consultar calquera dúbida no seguinte mail, techkids@cpeig.gal.

Actividades

No taller “Tech escape room”, deseñado para rapaces de 10 a 15 anos, os participantes farán uso de contidos matemáticos para crear enigmas, xogos e crebacabezas que necesitarán resolver para poder escapar da sala na que estarán pechados.

Outra das actividades centrarase no mundo dos drons. Os rapaces, de 13 a 17 anos, que participen neste taller de “Drones Leo Racing” gozarán da experiencia de pilotar drons e aprenderán diferentes aspectos técnicos de maneira lúdica e activa. 

Ademais, os rapaces e rapazas de 10 a 14 anos poderán participar no taller “Microbit Experience”, onde poderán facer divertidos programas para crear emojis en movemento, enviar mensaxes secretas entre as microbits, ademais de programar varios xogos, como o de fronte ou cruz ou a realizar un dado electrónico. 

Para seguir cunha mañá repleta de xogos e experiencias, a organización incluíu o obradoiro de “Leap Motion”, un sensor de movemento que permite controlar o computador mediante xestos que se realizan no aire. Os máis pequenos debuxarán no aire, moverán estruturas ou construirán coas súas mans, todo reflectido nun videoxogo. 

O “Electric Paint” é un xogo que permite experimentar con pintura condutiva que funciona sobre multitude de superficies como roupa, mobles, paredes, tea, etc. Estas pinturas á auga posúen a propiedade de conducir a electricidade e son axeitadas para crear circuítos brandos e fabricar sensores. É unha actividade ideal para iniciarse na electrónica e a programación, ao mesmo tempo que axuda aos rapaces a poñer en práctica os coñecementos artísticos.

E nesta xornada tamén terá cabida o cine. Os pequenos de todas as idades poderán participar no obradoiro “A maxia do cine”. Nunha sociedade onde os rapaces son uns apaixonados de Youtube e dos mundos virtuais por aumentar o seu espazo vital, mostraráselles con este taller como conseguilo, converténdose en protagonistas da súa propia aprendizaxe facendo cameos nas súas películas favoritas.

Posibilidades profesionais da creación dixital: videoxogos e animación

De forma simultánea, celebrarase das 12 ás 14 horas dúas conferencias sobre o mundo dos videoxogos e a animación do director e fundador do Congreso Internacional de Animación, Efectos Especiales y Nuevos Media “Mundos Digitales”, Manuel Meijide, e o cofundador da produtora audiovisual Illusorium Studios – recoñecido estudio de postprodución nacional especializado en 3D–, Raúl Rocha.

Durante esta sesión de traballo, Mundos Digitales presenta en primicia a nova rede social de Facebook, baseada en realidade virtual e con escenarios recreados pola compañía española Illusorium Studios. Raúl Rocha fará a presentación e repasará os fitos e oportunidades dun proxecto destas características.

Máis de 400 rapaces participaron nas xornadas deste verán nas Aulas CeMIT 

O CPEIG e a Amtega organizaron nos meses de xullo, agosto e setembro unhas xornadas sobre robótica, pilotaxe de drons e creación de personaxes para videoxogos ou películas de animación, enmarcadas no programa “TechKids”, destinado a fomentar o interese pola ciencia e a tecnoloxía entre a mocidade galega. 

Organizáronse 45 obradoiros nas Aulas CeMIT de diferentes concellos das catro provincias galegas nas que participaron 464 alumnos e alumnas. O seu obxecto foi achegar aos máis novos a industria dos contidos dixitais para ofrecerlle unha visión ampla dos perfís profesionais que demanda o sector, a formación e os estudos polos que deben optar se están interesados nesta saída profesional.

21/10/201914:00
Feijóo probando unha das 'experiencias' que se ofrecen nas 'aulas Newton'.
Lugo

Feijóo refírese ás Aulas Newton como a constatación da aposta de Galicia pola innovación e o sector aeronáutico que permitirá a máis de medio millar de alumnos alimentar a súa vocación tecnolóxica

  • O titular da Xunta participou esta mañá no lanzamento desde a cidade de Lugo do proxecto Newton, que percorrerá toda Europa
  • Salienta que este proxecto fomentará un coñecemento científico-técnico que servirá para formar aos futuros profesionais do I+D e da industria de Galicia
  • Resalta o compromiso de converter Galicia nun referente no sector aeronáutico co Polo aeroespacial de Rozas
  • Agradece o compromiso de empresas como Boeing e First Scandinavia e administracións que fixeron posible que esta iniciativa se consolidase
  • Incide na importancia de seguir atraendo empresas punteiras do sector aeronáutico, fomentando vocacións e reforzando o labor dos centros de coñecemento e impulsando unha formación atenta ás necesidades da industria

 

O presidente do Goberno galego, Alberto Núñez Feijóo, referiuse hoxe ás aulas Newton como a constatación do compromiso de Galicia coa innovación e o sector aeronáutico que permitirá a máis de medio millar de estudantes da provincia de Lugo alimentar a súa vocación tecnolóxica.

Durante o lanzamento do proxecto desde a cidade de Lugo, e que percorrerá toda Europa, Feijóo agradeceu o compromiso de empresas –Boeing e First Scandinavia- e administracións -do Concello de Lugo, da Consellería de Educación e da Consellería de Economía- que fixeron posible que esta iniciativa se consolidase, situando a Galicia como un destacado axente educativo. Non en van, estas aulas fomentarán un coñecemento científico-técnico que servirá para formar aos futuros profesionais do I+D e da industria de Galicia.

“Co fomento dos coñecementos STEM, particularmente das matemáticas e do aeronáutico, podemos estar formando á próxima xeración de pilotos, de controladores aéreos, de mecánicos, de enxeñeiros aeronáuticos ou de deseñadores da industria aeroespacial, por exemplo. Nas súas mans estará resolver os retos do futuro grazas ás novas tecnoloxías: a mobilidade, a electrificación, os medios de transporte ou a transición enerxética, entre outras”, abundou, aseverando que a Aula Newton representa unha revolución educativa polos seus compoñentes móbiles e polos seus contidos educativos, consolidando un proxecto centrado na diversificación cara a novos sectores industriais.

Sobre este último punto, o responsable do Executivo autonómico destacou a aposta de Galicia por converterse nun referente no sector aeronáutico co Polo aeroespacial de Rozas, que conta unha incubadora de proxectos, que xa está a dar os seus froitos cunha mobilización de 164 millóns de euros de investimento público-privado e coa creación de preto de 480 postos de traballo.

“Estamos traballando con empresas e centros tecnolóxicos que aportan a Galicia coñecemento, a través de proxectos de I+D+i; solucións que repercuten directamente na calidade de vida dos cidadáns, como a mellora na seguridade da frota pesqueira, servizos na loita contra os incendios ou incluso a protección cardiovascular no Camiño de Santiago, ademais de equipamentos e infraestruturas; e de potencial emprendedor”, explicou, subliñando o papel decisivo que xoga neste último eido o Business Factory Aero, como incubadora e aceleradora de proxectos empresariais.

Feijóo incidiu na importancia de seguir atraendo empresas punteiras do sector aeronáutico, fomentando vocacións e reforzando o labor dos centros de coñecemento e impulsando unha formación atenta ás necesidades da industria. Para iso, recordou que os vindeiros orzamentos autonómicos incluirán unha partida de máis de 15 millóns de euros para consolidar o Polo aeroespacial de Rozas, un dos eixes da Galicia innovadora da vindeira década.

21/10/201910:52
Unha muller utiliza os novos audífonos Starkey Livio AI.
Santiago de Compostela

Detector de caídas ou tradutor, a última tecnoloxía dos audífonos de Starkey

Starkey é un dos fabricantes de audífonos máis innovador do mercado e así o volveu a demostrar cos seus modelos Livio AI, que incorporan numerosa tecnoloxía para transformar estes dispositivos co obxectivo de mellorar a calidade de vida das persoas con discapacidade auditiva.

Os novos Starkey Livio AI introducen novidades que fan que estes audífonos, que en principio tiñan como único obxectivo axudar a oír mellor ás persoas con discapacidade auditiva, vaian máis aló e se convertan nun compañeiro que mellorará a calidade de vida dos usuarios.

Os audífonos Livio AI incorporan baterías recargables e a tecnoloxía Hearing Reality para mellorar a calidade do son percibido, así como o sistema de cancelación de ruídos e asubíos.

Con todo, é na tecnoloxía adicional e na conectividade onde estes dispositivos supoñen unha verdadeira revolución.

Aos avances habituais como recibir música ou chamadas directamente no audífono, engádense outras novidades como a adaptación ás preferencias do usuario de forma automática en función da súa localización.

Así mesmo, os modelos Livio AI incorporan sensores que permiten analizar a actividade física e cerebral do usuario, avisar en caso de caída ou medir a frecuencia cardíaca.

Tamén a súa conexión co smartphone do usuario permite traducir unha conversa a 27 idiomas diferentes, transcribir conversacións para logo poder lelas no móbil.

Estas opcións están dispoñibles a través da tecnoloxía Thrive, unha app móbil que facilita ao máximo o control dos audífonos aos usuarios.

Blog Xente Dixital

Como aumentar a túa visibilidade en Instagram

Ven 30 Nov

Aínda que as redes sociais naceron orixinariamente para relacionarnos entre nós, é un lugar no que se pode sacar moito rédito empresarial se sabemos como explotalas de maneira adecuada para os nosos intereses. Instagram é unha das redes máis populares na actualidade, polo que estar presente nela é...

LER MAIS

Tres alternativas gratuitas a YouTube para ver contidos orixinais

Mar 06 Nov

Cando falamos de creadores audiovisuais é habitual pensar en directores de cinema ou guionistas que levaron as súas obras a algún gran formato adaptado ao gran público. Pero con Internet o termo de creador audiovisual expandiuse, describindo tamén aos famosos  youtubers, que crean e producen...

LER MAIS

Un tipo de letra para recordar mellor o que les

Mar 09 Out

Ao ler algo que necesitamos memorizar, é habitual que poñamos o “piloto automático” e acabemos lendo todo sen realmente memorizar nada. É algo que ocorre a miúdo cando a lectura é obrigada e a única solución ata agora era poñer máis interese no que estamos a ler. E dicimos ata agora porque un...

LER MAIS