main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

09/07/201909:03
Cartel da iniciativa.
Pontevedra

A Deputación de Pontevedra e a EOI melloran con TIC a empregabilidade da xente nova

proxecto Millennials da Deputación de Pontevedra está a levar a formación tecnolóxica aos concellos da provincia, poñendo o foco nas novas xeracións e nas potencialidades de empregabilidade e formación das TIC. Millennials, que se enmarca no convenio de colaboración coa Escola de Organización Industrial (Programa Operativo de Garantía Xuvenil), achega accións formativas e asesoramento de balde para mozas e mozos de idades comprendidas entre os 16 e os 30 anos. 

Desenvólvese en Ponteareas (programación web con software libre), en Pontevedra (creación e xestión de tendas en liña, mercadotecnia dixital, fidelización), en Vigo (deseño e prototipado rápido mediante impresión 3D e mecanizado, creación de contidos dixitais, creación de aplicacións móbiles, organización e xestión da produción, xestión de empresas turísticas) e en Vilagarcía de Arousa (especialista en turismo activo e actividades no medio natural). 

A formación en Ponteareas

A Concellería de Mocidade de Ponteareas que dirixe Miguel Bouzó informa que xa esta aberto o prazo de inscrición para a acción formativa Programación web con software libre. Web development bootcampO curso, de 316 horas, realizarase no Centro de Desenvolvemento Local (CDL) na aula de informática entre o 17 de xullo e o 17 de outubro en horario de 9 a 14 horas. Miguel Bouzó explica que esta formación permitirá ás mozas e aos mozos mellorar a súa empregabilidade para acceder ao mercado laboral e recibir formación e asesoramento gratuíto.

09/07/201908:50
Participantes no curso de desenvolvemento de aplicacións.
Madrid

A Fundación ONCE e EVO Banco forman a persoas con discapacidade no desenvolvemento de aplicacións móbiles

  • Reciben de 180 horas de formación sobre desenvolvemento de aplicacións móbiles para fomentar a capacitación en novas tecnoloxías e inclusión no mercado laboral.

 

Doce persoas con discapacidade participaron na primeira edición do programa formativo Desenvolvemento de aplicacións para móbiles en sistema operativo Android que organizou a Fundación ONCE co apoio de EVO Banco.

A formación supuxo un total de 180 horas lectivas das cales 40 dedicáronse ao desenvolvemento de aplicacións para móbiles de forma real, é dicir, desenvolvendo un prototipo de app financeira de fácil accesibilidade.

Os doce alumnos organizáronse en tres grupos de traballo que presentaron as súas respectivas propostas durante a clausura do curso, que contou coa asistencia de Sabina Lobato, directora de Formación e Emprego, Operacións e Transformación da Fundación ONCE, e José Carlos Méndez, responsable de Comunicación e Redes Sociais Corporativas de EVO Banco.

Acto de clausura do programa sobre desenvolvemento de aplicacións para móbiles

No acto de clausura tamén participou Belén Sandoval, Academy director de Opinno, entidade responsable da execución do programa formativo, o cal incorporou técnicas de Design Thinking, introdución ao sector financeiro na era dixital, formación en programación na contorna Android, Web Apps e deseño de Experiencia de Usuario e Accesibilidade.

A formación completouse con talleres de habilidades persoais e profesionais para incentivar a incorporación ao mercado laboral dos participantes.

O obxectivo do programa formativo é facilitar a capacitación tecnolóxica e o emprego en sectores relacionados coas novas tecnoloxías.

Ademais dos coñecementos teóricos adquiridos, os alumnos tiveron a ocasión de deseñar e publicar a súa propia aplicación de planificación financeira básica.

08/07/201908:46
Cartel do evento.
A Coruña

Mundos Digitales achegará a mocidade os secretos da animación 3D e os videoxogos cun obradoiro de balde

A XVIII edición de Mundos Digitales terá lugar entre os días 11 e 13 na Coruña, e a xeito de anticipo o vindeiro mércores na sede de Afundación celébrase un obradoiro xuvenil organizado en colaboración co CPEIG no que se achegará a rapaces de máis de 14 anos os segredos da creación da animación 3D e os videoxogos. Esta actividade, encadrada no programa TechKids do CPEIG e a AMTEGA, desenvolverase de 16:00 a 19:00 horas e será completamente de balde.

Os participantes no Kids & Teens Lab coñecerán os trucos e métodos precisos para a creación de personaxes de animación 3D e efectos visuais feitos por ordenador. Aprenderán como se crean os personaxes virtuais, a animación 3D ou os efectos dixitais que vemos en películas a través de exemplos reais de efectos visuais de todo tipo, pasando pola animación, a publicidade, o cine e o mundo dos videoxogos. Os interesados en participar teñen que remitir o seu formulario de inscrición por correo electrónico a info@mundosdigitales.org.

08/07/201908:29
Logo Alastria.
Santiago de Compostela

Alastria e a Amtega abordan nunha xornada as oportunidades e os retos da tecnoloxía blockchain para sectores estratéxicos da economía galega

  • O vindeiro mércores a Cidade da Cultura acolle o encontro, organizado por ambas entidades, no que se presentarán casos de uso e retos no sector bancario, alimentario e da Administración

 

A Axencia para a Modernización Tecnolóxica de Galicia (Amtega) e Alastria organizan o vindeiro mércores, na Cidade da Cultura, unha xornada sobre os retos e oportunidades que ofrece a aplicación da tecnoloxía blockchain en distintos ámbitos estratéxicos de Galicia.

No encontro, que será inaugurado pola directora de Amtega, Mar Pereira, e a presidenta de Alastria, María Parga, presentaranse exemplos da aplicación de blockchain no sector bancario, da man de ABANCA. Ademais, lanzaranse distintos retos por parte do sector público e privado nos que o blockchain pode ofrecer solucións que melloren a transparencia e a seguridade.

Desde a Administración autonómica as propostas orientaranse á aplicación do blockchain á trazabilidade alimentaria, así como as posibilidades que ofrece esta tecnoloxía para mellorar a transparencia e a automatización da Administración. Desde o ámbito privado, a Asociación Nacional de Fabricantes de Conservas de Pescado e Marisco (Anfaco) proporá liñas de actuación nas que o blockchain pode axudar ao sector.

Os interesados en asistir á xornada, poden escribirse mediante un correo electrónico á dirección solucions-sectoriais.amtega@xunta.gal cos datos do asistente, e a organización ou empresa á que pertence.

Difusión da tecnoloxía blockchain

Esta xornada enmárcase nas actuacións previstas no convenio de colaboración asinado o pasado mes de marzo pola Amtega e Alastria, para o obxectivo de aplicar a tecnoloxía blockchain á xestión pública.

Entre os compromisos adquiridos por ambas as entidades está o de sumar esforzos para facilitar un mellor coñecemento e difusión do blockchain no ecosistema dixital galego así como explorar as posibilidades de mellora da actuación administrativa e a prestación dos servizos públicos a través da utilización desta tecnoloxía.

Alastria é un consorcio multisectorial sen ánimo de lucro, conformado por preto de 300 entidades, entre empresas, administracións públicas e universidades, que ten como obxectivo fundamental favorecer a implantación, estandarización, protección e utilización do Blockchain en España acorde co regulamento europeo.

Blockchain

O blockchain é unha tecnoloxía que permite gardar “bloques de información” conectados entre si en diferentes equipos, en lugar de condensar toda a información nun só lugar. Así, se se producise un fallo nunha plataforma de almacenamento, existen copias da información noutros lugares, o que o fai máis seguro que un sistema normal.

Ademais, a información está cifrada e non existe a posibilidade de eliminar ou modificar a xa existente, só engadir nova, o que favorece a transparencia. As principais vantaxes desta tecnoloxía son a eliminación de intermediarios, a ausencia de posicións dominantes e o aumento da contorna de seguridade nas operacións.

05/07/201915:32
Maker Faire Galicia 2019.
Santiago de Compostela

A comunidade argalleira xunta recursos de transformación na Maker Faire Galicia

Comezou finalmente a Maker Faire Galicia, quinta edición, a gran feira galega e estatal sobre tecnoloxías participativas, inclusivas, accesibles e colaborativas. A cita, unha boa oportunidade para iniciarnos como creadores de recursos tecnolóxicos de toda índole, celébrase estes días en Santiago, na Cidade da Cultura, artellándose en dúas vertentes: a vertente profesional (que comezou o mércores 3 de xullo e desenvólvese até a última hora de hoxe) e a vertente aberta a todos públicos (a partir de mañá e até o domingo). 
A feira recibiu hoxe a visita do conselleiro de Economía, Francisco Conde, quen participou na xornada Empresas con alma de startup reivindicando as empresas innovadoras e as persoas con talento, “que son as impulsoras da transformación dixital”.

Na súa intervención, Conde felicitou á organización da Maker Faire por unha iniciativa que “se está a consolidar e que sitúa a Galicia no mapa, converténdoa nun escaparate de creatividade e innovación", xa que nas catro edicións anteriores acudiron a este evento mais de 40.000 persoas, tanto no eido profesional como público xeral que puido participar nos obradoiros que se organizan para achegar o movemento maker á sociedade.

Durante os tres días profesionais que culminan hoxe podemos atopar charlas e mesas redondas onde se tratan temas tan de actualidade como a robótica, a ciberseguridade, o Open Data, a enerxía, a mobilidade ou a Intelixencia Artificial. Son, en total, tres temáticas por día. Participan empresas como Iberdrola, Repsol, Cellnex ou Siemens; e empresas galegas de recoñecido prestixio como FINSA, Plexus, Televés, Kaleido ou Alén Space, que presentarán os seus proxectos. 

Na xornada de hoxe venres desvelaranse os 3 mellores proxectos makers profesionais, que competirán por ese primeiro posto ante un xurado de expertos. Finalmente rematará cun xantar networking no que se fomentará o intercambio de opinións entre os asistentes e os relatores. As xornadas organízanse en colaboración con APD, a Xunta de Galicia, o Instituto Galego de Promoción Económica (IGAPE) e o Círculo Financeiro de Galicia e enmárcanse dentro do Proxecto Capacita Directivos.
A Maker Faire Galicia vén da man de VermisProject, o Concello de Santiago e a Fundación Cidade da Cultura.

Xornadas Abertas

As xornadas abertas a todos os públicos celebraranse os días 6 e 7 de xullo. Durante toda a fin de semana no Museo Centro Gaiás da Cidade da Cultura de Galicia, de 10 da mañá a 8 da tarde, nenos, adultos e maiores poderán gozar de numerosas charlas e actividades para todos os gustos.

Entre os relatores destaca a figura de Soledad Ayuso, unha avoa maker que imprime todo o que se imaxina en 3D, desmitificando a idade como un factor limitador para converternos en argalleiras e argalleiros de tecnoloxía. O programa compleméntase coas charlas autoorganizadas sobre tecnoloxía que xestionan desde Compostela Tech e na parte máis científica os rapaces e rapazas de UDC Big Bang falarán sobre o 150 aniversario da táboa periódica.

No tocante ás actividades e obradoiros que se desenvolverán durante a feira o abano temático é ben amplo: pilotaxe de drons, creación de microscopios caseiros, mistura de papiroflexia e electrónica, Arduino, programación… E outra das actividades con maior participación será a Hebocon, unha competición de robots absurdos que na pasada edición captou a atención de pequenos e maiores e na que este ano animamos a todos a participar e axudarnos a convertela na maior Hebocon de España.

Blog Xente Dixital

Como aumentar a túa visibilidade en Instagram

Ven 30 Nov

Aínda que as redes sociais naceron orixinariamente para relacionarnos entre nós, é un lugar no que se pode sacar moito rédito empresarial se sabemos como explotalas de maneira adecuada para os nosos intereses. Instagram é unha das redes máis populares na actualidade, polo que estar presente nela é...

LER MAIS

Tres alternativas gratuitas a YouTube para ver contidos orixinais

Mar 06 Nov

Cando falamos de creadores audiovisuais é habitual pensar en directores de cinema ou guionistas que levaron as súas obras a algún gran formato adaptado ao gran público. Pero con Internet o termo de creador audiovisual expandiuse, describindo tamén aos famosos  youtubers, que crean e producen...

LER MAIS

Un tipo de letra para recordar mellor o que les

Mar 09 Out

Ao ler algo que necesitamos memorizar, é habitual que poñamos o “piloto automático” e acabemos lendo todo sen realmente memorizar nada. É algo que ocorre a miúdo cando a lectura é obrigada e a única solución ata agora era poñer máis interese no que estamos a ler. E dicimos ata agora porque un...

LER MAIS