main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

17/10/201908:37
Cartel da iniciativa.
Santiago de Compostela

Fernando Suárez, Isidro Fernández e Mar Pereira clausuran este xoves Cybersec@Gal

Esta semana estase a desenvolver na Coruña, Santiago e Vigo o encontro Cybersec@Gal o primeiro foro galego sobre seguridade na empresa dixital, impulsado pola Cátedra R en Ciberseguridade e o Colexio Profesional de Enxeñaría en Informática de Galicia, o CPEIG. A finalidade dos encontros é afianzar o papel referente de Galicia en materia de tecnoloxías e servizos para garantir a protección dixital. O evento, logo de varias actividades formativas nas escolas de Informática e Telecomunicacións da UDC e a da UVigo, clausurarase este xoves 17 na Cidade da Cultura (Auditorio Neira Vilas) cunha sesión que durará toda a mañá: de 9.30 a 14.00 horas.

Na sesión porase o foco nas empresas e, para isto, contarase coa presenza de expertos estatais e internacionais afondando nas claves da ciberseguridade dende “múltiples perspectivas”, informa a operadora R, engadindo que na cuarta e derradeira xornada dos encontros está previsto que participen o director de Empresas de R e do Grupo Euskaltel, Isidro Fernández de la Calle, Fernando Suárez, presidente do Colexio Profesional de Enxeñaría en Informática de Galicia (CPEIG) e Mar Pereira, directora da Axencia para a Modernización Tecnolóxica de Galicia (AMTEGA).

Catro xornadas de debate e formación

Cybersec@Gal achegou estes días catro xornadas de obradoiros, ciber-desafíos e charlas, nas que se falou de solucións, normativas, desafíos e ameazas para a seguridade na contorna dixital. O foro foi dirixido, por unha banda, a estudantes e recentemente licenciados e, pola outra, ao ecosistema empresarial (este xoves), da man de expertos estatais e internacionais que exporán diversos aspectos no terreo da seguridade TIC. Na xornada de clausura deste xoves entregaranse un total de seis premios valorados en 2.600 euros en total: un premio á Tese de Doutoramento en Ciberseguridade (700 euros), dous premios á Tese fin de Mestrado en Ciberseguridade na UDC e a UVigo (400 euros cada un), dous premios á Tese de Fin de Grao en Ciberseguridade na UDC e a UVigo (300 euros cada un) e un premio reto Gradiant - Hijos de Rivera (500 euros).

17/10/201908:33
Cartel do evento.
As Pontes

GIMP e Raspberry Pi centrarán un novo obradoiro de Amigus

As actividades argalleiras da Asociación Amigus (os obradoiros Amigus Labs) van ter continuidade este 26 de outubro, logo da inauguración oficial, este día 12, do Amigus Labs Centro de Arte e Creación Dixital, así como do Fab Lab As Pontes (na praza do Hospital das Pontes, no número 14). Na sesión do 26 achegárasenos a ferramentas abertas de gran utilidade, tanto para o noso lecer como para ámbitos máis de tipo profesional.

Na nova cita, os participantes mergullaranse nas funcionalidades e potencialidades do software e o software libre para a edición e retoque de imaxes cos programas GIMP (a ferramenta libre de edición de imaxes dixitais con feitura de mapa de bits, tanto debuxos como de fotografías) e Raspberry Pi (un computador miúdo que se conecta a un televisor e un teclado e que pode ser utilizado para cunha manchea de cousas: follas de cálculo, procesadores de texto, editores gráficos, xogos, vídeos de alta definición, etc). O obradoiro desenvolverase en horario de 11:00 a 14:00 horas. Para asistir ao taller é obrigatorio que nos rexistremos na páxina do evento http://www.amiguslabs.org/amigus-labs-gimp-e-raspberry-pi/. A asociación recoméndanos que acudamos cun ordenador portátil co GIMP xa instalado, aínda que teremos a opción de usar os equipos de demostración con Raspberry PI. A inscrición é de balde e o prazo remata o 25 de outubro (prazas limitadas).

17/10/201908:30
Cartel do evento.
A Coruña

A UDC reúne a expertos internacionais en tecnoloxía e analítica de datos no congreso Big Data Coruña 2019

O Centro de Investigación en Tecnoloxías da Información e as Comunicacións da Universidade da Coruña (CITIC) acollerá os vindeiros días 21 e 22 de outubro a quinta edición do evento internacional Big Data, avalado polo éxito de participación das pasadas edicións.

Big Data Coruña 2019 reunirá a expertos en tecnoloxía e analítica de datos de nivel internacional en dúas xornadas que afondarán nos novos retos aos que se enfronta esta disciplina na actualidade. Os seus contidos, ademais de resultar de interese para a comunidade académica (a Facultade de Informática imparte desde este curso o Grao en Ciencia e Enxeñaría de Datos), tamén serán atractivos para empresas e organizacións, pois actualmente Big Data é un dos campos que máis interese esperta, tanto pola súa aplicación como pola súa posta en valor nunha ampla variedade de ámbitos.

O evento está organizado pola profesora Amparo Alonso, presidenta da Asociación Española para a Intelixencia Artificial, catedrática de Ciencias da Computación e Intelixencia Artificial da UDC e investigadora no CITIC; Bertha Guijarro, coordinadora do Grao en Ciencia e Enxeñaría de Datos e investigadora no CITIC; e David Martínez, investigador da área de Big Data da University College London e director da área de investigación de DataSpartan. Colaboran na organización a Rede Galega de Tecnoloxías Cloud e Big Data para HPC, o CITIC e a Facultade de Informática. A asistencia é libre previa inscrición antes do venres, 18 de outubro.

16/10/201916:45
Mans tecleando nun portátil.
Santiago de Compostela

Preto do 89% dos fogares galegos ten contratado internet, un 7,5% máis que hai un ano

  • É o maior crecemento rexistrado desde 2016 e reduce a diferencia coa media estatal a 2,6 puntos
  • O maior incremento prodúcese nos núcleos de menos de 10.000 habitantes, nos que, por primeira vez, supérase a porcentaxe do 80% de fogares conectados
  • En canto ao uso da rede, medra 15 puntos na franxa de idade entre os 55 e os 64 anos
  • Nas vilas de entre 20.000 e 100.000 habitantes a media galega supera á estatal na contratación a Internet e de banda larga
  • A principal tecnoloxía de acceso a Internet nos fogares galegos é unha conexión móbil de banda larga a través dun dispositivo de man, coa que conta o 83,1% dos fogares

 

Preto do 89% dos fogares galegos ten contratado Internet, o que supón un incremento do 7,5% con respecto ao ano 2018, superior ao crecemento do conxunto do Estado (5,8%) e o maior rexistrado desde 2016. O crecemento máis importante prodúcese nos concellos galegos con menor poboación, os de menos de 10.000 habitantes, nos que os fogares conectados pasan dun 74,6% a un 81,2%. Nos espazos urbanos o crecemento na contratación de Internet e da banda larga é superior á do conxunto do estado.

Son parte dos datos publicados hoxe polo INE sobre o equipamento e uso das TIC nos fogares en 2019 e analizados polo Observatorio da Sociedade da Información e a Modernización de Galicia (OSIMGA), dependente da Axencia para a Modernización Tecnolóxica de Galicia (Amtega),

As cifras confirman que os galegos por debaixo dos 34 anos superan a media estatal no uso habitual de Internet, pero especialmente en relación ás compras online, de modo que os mozos galegos superan en 6 puntos porcentuais ao conxunto dos españois. Ao mesmo tempo estanse a producir incrementos significativos do uso das TIC entre a poboación de maior idade.

Uso das TIC

O 84% dos galegos e galegas de 16 a 74 anos utilizaron Internet nos tres últimos meses, cun incremento do 4,5%, con respecto ao ano anterior. Entre a poboación máis nova, por debaixo dos 35 anos, o uso de Internet é practicamente universal. Cómpre destacar o crecemento no grupo de idade de 55 aos 64 anos, onde o uso da Rede medra 15 puntos porcentuais respecto ao ano 2018.

Ademais dos usos tradicionais, como a mensaxería instantánea ou o correo electrónico, un dos usos de Internet máis estendidos entre os internautas galegos é a banca electrónica, que utiliza o 64,6% dos internautas na nosa comunidade, catro puntos máis que a media estatal. Salientar tamén o importante uso da nube como sistema de almacenamento de ficheiros con fins privados, que practica un 46,2% dos galegos que utiliza Internet converxendo co conxunto do Estado. 

Tipo de conexión e hábitat

Segundo a información que ofrece o INE, a maior parte das vivendas que dispoñen de acceso a Internet en Galicia, un 83,1% emprega unha conexión móbil de banda larga a través dun dispositivo de man. Trátase da principal tecnoloxía de acceso, por diante da conexión por ADSL, cable ou fibra, que utiliza o 76,2% dos fogares. No conxunto de España as posicións invírtense.

Respecto aos datos relativos ao tamaño do hábitat, é salientable que nos concellos con poboación maior de 20.000 habitantes, a media galega iguala ou supera á estatal na contratación a Internet e a banda larga.

Especificamente nas vilas galegas de 20.000 a 50.000 habitantes rexístrase un forte ritmo de crecemento dos indicadores relacionados coa contratación de Internet e de banda larga. Neste tipo de concellos a conexión a Internet de banda larga medrou máis dun 8,5%, situándose no 94,1%, superando o valor da media estatal en 2,5 puntos porcentuais.

16/10/201912:30
Presentación da iniciativa.
Santiago de Compostela

Alumnado de 50 centros educativos galegos mellorarán durante dous cursos as súas competencias dixitais a través de Digicraft

  • A conselleira de Educación e a directora da Amtega participaron na presentación desta iniciativa, desenvolvida en colaboración coa Fundación Vodafone
  • Carmen Pomar defendeu o uso “seguro e crítico” da tecnoloxía nas aulas e a necesidade de incorporar contido humanístico para fomentar a comunicación, a capacidade lingüística, o espírito emprendedor, o traballo en equipo e a toma de decisións
  • Mar Pereira enmarcou esta iniciativa no Plan de Promoción do Talento Dixital para fomentar as vocacións tecnolóxicas entre os máis novos

 

O alumnado de 50 centros educativos de toda Galicia participará durante dous cursos académicos no proxecto Digicraft, que ten como obxectivo a mellora das competencias dixitais dos máis novos. A conselleira de Educación, Universidade e Formación Profesional, Carmen Pomar, e a directora da Amtega, Mar Pereira, abordaron esta mañá cos docentes e directores dos colexios participantes esta iniciativa, desenvolvida en colaboración coa Fundación Vodafone España. No acto de apertura participou, tamén, o presidente e CEO de Vodafone España, Antonio Coimbra.

 

A conselleira de Educación salientou que Galicia é unha das poucas comunidades autónomas que está facendo unha aposta “seria e global” polo uso “seguro e crítico” da tecnoloxía nas aulas desde a etapa de infantil, e sempre “coidando incorporar contido humanístico á revolución tecnolóxica que vivimos”. Nesta liña enmárcase o proxecto Digicraft no teu cole xa que -en palabras da conselleira- “fai unha aproximación diferente que trata de achegar os estudantes ao mundo dixital converténdoos en creadores, non como consumidores”. Así, ademais do reforzo de competencias dixitais nas aulas, esta iniciativa vai permitir tamén “outras como a comunicación, aprender a aprender, desenvolver a iniciativa ou o espírito emprendedor, fomentar o traballo en equipo, a resolución de problemas, a toma de decisións, a capacidade lingüística oral e escrita, o razoamento crítico e a aprendizaxe autónoma”, sinalou Carmen Pomar.

 

Pola súa parte a directora da Amtega dixo que esta iniciativa vén complementar a estratexia de Galicia para avanzar na transformación dixital das aulas e na capacitación dixital dos galegos. Neste sentido, lembrou que a día de hoxe a iniciativa Abalar permite que máis de 120.000 rapaces estuden en aulas dixitais e que neste curso 27.000 alumnos estén a desenvolver a súa actividade académica nunha contorna exclusivamente dixital. Mar Pereira destacou tamén a importancia de espertar as vocacións tecnolóxicas entre os máis novos con propostas como o Digicraft, enmarcada no Plan de Promoción do Talento Dixital, DigTalent, ao que está adherido Vodafone e agradeceu que a Fundación Vodafone escollese Galicia como a primeira comunidade na que desenvolver esta iniciativa.

Obxectivos

O proxecto Digicraft no teu cole ten como obxectivo potenciar o desenvolvemento da competencia dixital na infancia e na xuventude, a través dun programa de formación e reforzo das habilidades dixitais e das competencias asociadas do que se beneficiarán máis de 3.800 nenos e nenas de entre 6 e 12 anos. Ao seu abeiro traballaranse nas cinco áreas competenciais que definen a competencia dixital, en concreto a información e alfabetización informacional, a comunicación e colaboración, a creación de contidos dixitais, a seguridade e a resolución de problemas. Dentro delas abordaranse asuntos como a procura e filtrado de datos, a participación cidadá en liña, a xestión da identidade dixital, os dereitos de autor e licenzas, a programación, a protección de datos persoais e a privacidade ou a identificación de necesidades e respostas tecnolóxicas, entre outros aspectos.

 

Abordar estas áreas supón, pola súa transversalidade, traballar, ademais da dixital, as competencias en comunicación lingüística, de aprender a aprender o sentido da Iniciativa e espírito emprendedor. Neste sentido, as actividades reforzan o traballo en equipo, a resolución de problemas, a toma de decisións, a capacidade de comunicación oral e escrita, o razoamento crítico e a aprendizaxe autónoma, entre outras.

 

En cada curso académico trabállanse dous itinerarios de 14 horas de duración (un total de 1 h/semana durante 28 semanas lectivas). Estes itinerarios están compostos por unha serie de actividades que van aumentando gradualmente en nivel de dificultade. As actividades combinan o mundo dixital e a tecnoloxía co xogo, o aprender facendo e o desenvolvemento de habilidades motoras.

 

Cada actividade conta cunha guía didáctica na que se explica que competencias (dixitais e xerais) se traballan, os obxectivos que se queren lograr, o material necesario e os pasos para seguir para realizala. Dado que traballa parte das competencias definidas no currículo de primaria, Digicraft no teu cole pódese impartir tanto en horario lectivo como fóra del.

Formación e equipamento

Uns 100 docentes dos 50 centros seleccionados recibirán formación específica para impartir o programa nas aulas. Ademais, dotarase os colexios de 600 tabletas e 100 kits tecnolóxicos instant dixital skills. Estes kits contan con placas de programación básica axeitadas para nenos, materiais para visualizar elementos en realidade aumentada de forma sinxela e manexable; pirámides holográficas que permiten a visualización de hologramas e algúns outros materiais tales como barallas de cartas e taboleiros.

 

Así mesmo facilitaráselles aos centros acceso aos materiais descargables para o desenvolvemento das actividades recollidas no programa.

Centros seleccionados

Os centros seleccionados, que participarán na iniciativa ao longo dos cursos 2019/20 e 2020/21, son os reflectidos na seguinte táboa:

Provincia

Concello

Centro

A Coruña

A Baña

CPI de San Vicente

A Coruña

A Coruña

CEE Nuestra Señora de Lourdes

A Coruña

A Coruña

CPR Calasanz

A Coruña

A Coruña

CPR Plurilingüe Karbo

A Coruña

Ames

CEIP de Barouta

A Coruña

Ames

CPR Alca

A Coruña

Bergondo

CPI Cruz do Sar

A Coruña

Betanzos

CPR Plurilingüe Nuestra Señora del Carmen

A Coruña

Carballo

CEIP Xesús San Luis Romero

A Coruña

Cerceda

CPI Plurilingüe O Cruce

A Coruña

Ferrol

CEIP de Pazos

A Coruña

Ferrol

CPR Tirso de Molina

A Coruña

Melide

CEIP Mestre Pastor Barral

A Coruña

Moeche

CEIP San Ramón

A Coruña

Monfero

CEIP Plurilingüe Virxe da Cela

A Coruña

Oroso

CEIP Plurilingüe do Camiño Inglés

A Coruña

Porto do Son

CEIP de Campanario

A Coruña

Santiago de Compostela

CEIP Plurilingüe Cardeal Quiroga Palacios

Lugo

Begonte

CEIP Virxe do Corpiño

Lugo

Burela

CEIP Plurilingüe Vista Alegre

Lugo

Cervo

CEIP de Cervo

Lugo

Foz

CEIP Número 1 de Foz

Lugo

Foz

CPR Nuestra Señora del Pilar

Lugo

Lugo

CEIP Rosalía de Castro

Ourense

Cualedro

CEIP Vicente Risco

Ourense

O Barco

CEIP Condesa de Fenosa

Ourense

Ourense

CEIP Plurilingüe Virxe do Camiño

Ourense

Ourense

CPR Divina Pastora Franciscanas

Ourense

Ourense

CPR Santo Ángel

Ourense

Toén

CEIP Saco e Arce

Ourense

Vilamartín de Valdeorras

CEIP Xosé Manuel Folla Respino

Pontevedra

A Estrada

CEIP do Foxo

Pontevedra

Baiona

CEIP Fontes

Pontevedra

Caldas de Reis

CPR Plurilingüe La Encarnación

Pontevedra

Caldas de Reis

CPR Plurilingüe San Fermín

Pontevedra

Cambados

CEIP Corvillón

Pontevedra

Lalín

CEIP Manuel Rivero

Pontevedra

Moaña

CEIP de Domaio

Pontevedra

Moaña

CEIP de Quintela Moaña

Pontevedra

Nigrán

CEIP da Cruz

Pontevedra

O Porriño

CEIP Antonio Palacios

Pontevedra

Poio

CEIP Espedregada

Pontevedra

Sanxenxo

CEIP Plurilingüe de Nantes

Pontevedra

Silleda

CEIP Ramón de Valenzuela

Pontevedra

Tomiño

CEIP Plurilingüe de Tebra

Pontevedra

Tui

CEIP Plurilingüe Número 1

Pontevedra

Vigo

CEIP Plurilingüe Valadares

Pontevedra

Vila de Cruces

CEIP Nosa Señora da Piedade

Pontevedra

Vilagarcía de Arousa

CEIP O Piñeiriño

Pontevedra

Vilanova de Arousa

CEIP Plurilingüe Xulio Camba

Blog Xente Dixital

Como aumentar a túa visibilidade en Instagram

Ven 30 Nov

Aínda que as redes sociais naceron orixinariamente para relacionarnos entre nós, é un lugar no que se pode sacar moito rédito empresarial se sabemos como explotalas de maneira adecuada para os nosos intereses. Instagram é unha das redes máis populares na actualidade, polo que estar presente nela é...

LER MAIS

Tres alternativas gratuitas a YouTube para ver contidos orixinais

Mar 06 Nov

Cando falamos de creadores audiovisuais é habitual pensar en directores de cinema ou guionistas que levaron as súas obras a algún gran formato adaptado ao gran público. Pero con Internet o termo de creador audiovisual expandiuse, describindo tamén aos famosos  youtubers, que crean e producen...

LER MAIS

Un tipo de letra para recordar mellor o que les

Mar 09 Out

Ao ler algo que necesitamos memorizar, é habitual que poñamos o “piloto automático” e acabemos lendo todo sen realmente memorizar nada. É algo que ocorre a miúdo cando a lectura é obrigada e a única solución ata agora era poñer máis interese no que estamos a ler. E dicimos ata agora porque un...

LER MAIS